Danny Vumbi agiye kumurika album ya Gatatu yise ‘Inkuru Nziza’ iri kugurishwa ibihumbi 100 Frw

Umwanditsi w’indirimbo akaba n’umuhanzi ukomeye mu njyana ya Afro-beat, Danny Vumbi agiye kumurikira abakunzi be umuzingo w’indirimbo ze (Album) yise ‘Inkuru Nziza’.  Ubu iyi album yamaze kugezwa ku isoko aho ukeneye kuyumva mbere y’abandi ayigura ibihumbi 100Frw.

Semivumbi Daniel wamamaye mu muziki nka Danny Vumbi, yahoze ari umwe mu bahanzi bari bagize itsinda rya The Brothers aho ryasenyukiye buri wese agahitamo gukomeza umuziki ku giti cye amaze gushyira hanze album ebyiri arizo “Umudendezo” na “Kuri Twese” ndetse n’iyi ya gatatu “Inkuru Nziza” agiye kumurika.

Yamamaye cyane mu ndirimbo zandikanye ubuhanga ziri no mu mudiho wa kinyafurika harimo nka Ni danger, Ni uwacu, Abana babi n’izindi nyinshi zagiye zikundwa na benshi.

Kuri ubu uyu muhanzi usigaye abarizwa muri label ya KIKAC Music ageze kure imyiteguro yo kumurika Album ye ya gatatu ariyo ’Inkuru Nziza’ mu gitaramo kizabera ku mbuga nkoranyambaga kuko icyorezo cya Coronavirus cyarogoye uburyo bwose yateguraga kuyimurikamo nk’uko twabitangairijwe na Uhujimfura Claude uri mu bayobozi ba KIKAC Music.

Claude yagize ati “Twateganyaga ko muri Kanama 2020 azajya kumurikira Album ye mu Bufaransa no mu bindi bihugu by’u Burayi ibiganiro byari bigeze kure, mu gihe twiteguraga gutangaza aya makuru hahise haduka icyorezo cya Covid-19 cyashegeshe ibijyanye n’imyidagaduro ku Isi yose, tubonye ko bitagishobotse nibwo twatekereje uko twabyitwaramo.”

Mu ntangiriro z’iki cyumweru iyi album nshya ya Danny Vumbi yahise ishyirwa ku isoko itangira kugurishwa ku bashaka kuyumva mbere yuko imurikwa. Igizwe n’indirimbo 12 muri zo ebyiri gusa nizo zamaze kujya hanze ‘Abana babi’ na ‘Yibare’.

Album nshya ya Danny Vumbi izaba igizwe n’indirimbo 12.

Igiciro cy’iyi album kiri mu bikomeje kuvugisha benshi dore uyishaka asabwa kwishyura amafaranga y’u Rwanda ibihumbi 100.

Igitaramo cyo kumurika ‘Inkuru Nziza’ kizabera kuri shene ya Youtube yitwa MK1 ndetse no kuri Genesis TV ku itariki ya 17 Nyakanga 2020.

Muri iki gitaramo Danny Vumbi azafashwa n’abahanzi barimo Mico The Best babana muri Kikac, Bruce Melodie, Fireman, Uncle Austin, Marina ndetse n’itsinda rya Neptunez Band.

Uhujimfura Claude umwe mubayobozi ba Kikac Music label.

 

Tanga Igitekerezo ukoresheje Facebook

SHARE