Harabura amasaha make ngo Yverry amurike album ye ya mbere yise ‘Love you More’

Rugamba Yverry wamamaye mu muziki nka ‘Yverry’ ni umwe mu bahanzi beza mu njyana ya RnB mu Rwanda. Kuri uyu munsi w’abakundana nibwo amurika umuzingo we wa mbere (album) yise ‘Love you more’ mu gitaramo cyamateka akorera mu mujyi wa Kigali.

Iki gitaramo kirabera mu mujyi wa Kigali kuri uyu wa Gatanu tariki 14 Gashyantare 2020, ahitwa Kigali Conference and Exhibition Village (Camp Kigali).

Mu kiganiro uyu muhanzi yakoranye n’itangazamakuru ku mugoroba wo kuri uyu wa Kane, yavuze ko imyiteguro yose yarangiye kandi yagenze neza igisigaye ari amasaha ubundi agafatanya n’abakunzi be kuryoherwa n’umunsi w’abakundana.

Iyi album ya Yverry izaba igizwe n’indirimbo 10 harimo izisanzwe zizwi ndetse n’izindi nshyashya bazumvira bwa mbere mu gitaramo.

Uyu muhanzi yabajijwe n’umunyamakuru ku ndirimbo ‘Naremewe wowe’ ya Alyne Sano yasubiyemo uko yakabaye ndetse bikanakurura umwuka mubi hagati yabo, asubiza ko nayo iri muziri kuri iyi album kuko ngo ayifiteho uburenganzira.

Ati “Indirimbo ‘Naremewe wowe’ nayo iri mu zigize iyi album, nyifiteho uburenganzira 50% na we (Alyne Sano) akagira 50%. Birashoboka cyane ko indirimbo imwe abantu batandukanye bayigiraho copyright”.

Yverry uri mu banyuze mu ishuri ryamuzika ryo ku Nyundo ryaje kwimurirwa i Muhanga, azakora iki gitaramo ashyigikiwe na bagenzi be barimo King James, Andy Bumuntu, Queen Cha, Bruce Melodie ndetse na Cyusa Ibrahim.

Kwinjira muri iki gitaramo ni 5,000 Frw mu myanya isanzwe (Regular), ku bantu bakundana ni 15,000 Frw (Couple), mu myanya y’icyubahiro 20,000 Frw (VIP) naho ku meza y’abantu umunani ni 20,000 Frw.

Urupapuro rwamamaza iki gitaramo.

 

Tanga Igitekerezo ukoresheje Facebook

SHARE