Ibyo wamenya kuri Sonia uzwi muri filime ‘Indoto Series’ nka Betty, amaze kwigarurira imitima ya benshi mubakunzi ba sinema Nyarwanda

Sonia Mutako azwi muri filime ‘Indoto Series’ nka Betty, ni umwe mu bakinnyi bakunzwe muri sinema Nyarwanda bitewe n’uburyo akina ndetse n’imyitwarire yo mu buzima busanzwe.

Ni umukobwa utuje cyane ariko ukunda abantu. Uburyo atujemo bigutera kwibaza uko yatinyutse kujya muri sinema gusa impano ni nk’itara ntabwo ushobora kuritwikira ngo bikunde.

Sonia Mutako azwi muri filime ‘Indoto Series’ nka Betty

Uyu mukobwa yakuze akunda sinema haba kuzireba ndetse no gukurikiranira hafi ibijyanye nazo bituma, yifuza kuba yaba umukinnyi, nibwo yafashe iya mbere ajya gukina mu ‘Ndoto Series’.

Mutako Sonia, yavuze ko yakuze akunda gukina sinema ariko akabura umwanya, mu gihe cya guma mu rugo yaje kubifatira umwanya ahita ajya gushaka aho gukina.

Yagize ati “Ibintu bya Sinema narabikundaga kuva kera ariko ni kumwe ukunda ikintu ukajya ubura umwanya wo kugikora ariko wumva ugishaka, byaje kugeraho muri guma mu rugo ya mbere narebye filimi nyawanda mbonamo utuntu nakora mpita mfata icyemezo cyo kujya gukina.”

“Ubwo icyo nakoze ni ukubaza ahantu bari gushaka abakinnyi kuko twari mu bihe by’icyorezo hatinda kuboneka, baza kumbwira ahantu barabwira ngo ngwino ugerageze amahirwe yawe.”

Yakomeje avuga ko yagiye mu igeragezwa akabikora neza agatsinda niko gutangira gukina mu ‘Ndoto Series’.

Mutako uzwi nka Betty mu Ndoto, akina akunda umusore bakinana witwa Muhire kugeza n’ubwo amutereta. Uyu mukobwa yavuze ko kuva yatangira gukina filimi iki gice aricyo cyamugoye cyane.

Yagize ati “Bampa gukina ntereta Muhire nkibisoma byaransekeje, no kuyikora byarangoye, uyobora filimi yansubirishijemo nk’incuro igihumbi kuko najyaga kubikora nkiseka. Ariko ubu narabimenyereye numva nta kibazo.”

Mutako Yakomeje avuga ko nubwo yabishoboye muri filime, mu buzima busanzwe adashobora gutereta umuhungu n’iyo yaba yamukunze.

Yagize ati “Akantu k’isoni ntabwo kabura, ntabwo nzi ko nashobora gutereta umuhungu nk’uko mbikina muri filime, nkamutereta nkamweza nk’uko mbikora nkamusohokana. Nshobora kubikorera inshuti zanjye ariko umuhungu nkunda byangora.”

Ni umukobwa utuje cyane ariko ukunda abantu. Uburyo atujemo bigutera kwibaza uko yatinyutse kujya muri sinema

Kujya mu ndirimbo ni akazi

Mutako ni umwe mu bakobwa b’ikimero bajya mu mashusho y’indirimbo z’abahanzi, akaba ari mu ndirimbo nka Rumata ya Ruti Joel.

Kuri we avuga ko kujya mu mashusho ari akazi nk’akandi. Ni mu gihe myumvire ya bamwe, hari abatekereza ko kujya mu mashusho y’indirimbo ari uburara.

Yagize ati “Buriya kujya mu mashusho y’indirimbo ntabwo ubikorera ubuntu, uba uri gushaka amafaranga kandi baba bagomba kuguhemba. Njye kujyamo mbifata nk’akazi kandi karantunze mbikora mbikunze.”

Yakomeje avuga ko hari indirimbo atajyamo bitewe n’uko ameze cyane amusaba kwambara ubusa ariko adakwena abantu bazijyamo kuko aba ari amahitamo yabo.

Uyu mukobwa usanzwe uzobereye mu kazi k’iyamamazabikorwa avuga ko kwinjira mu sinema byamufunguriye amarembo kandi azakomeza kubikora cyane ko ashyigikiwe n’umuryango we.

Mutako ni umwe mu bakobwa b’ikimero bajya mu mashusho y’indirimbo z’abahanzi, akaba ari mu ndirimbo nka Rumata ya Ruti Joel.

Yaboneyeho umwanya wo gusaba ababyeyi gushyigikira abana mu mpano bifuza aho kubaca intege.

Yagize ati “Ikintu cyiza ni ukumva ikintu umwana ashaka kuko iyo akoze ikintu adashaka biramugora agatakaza imbaraga nyinshi. Iyo akoze ikintu ashaka rero biba byiza kuko n’ibihe bigoye iyo bije arihangana agakomeza agahatana. Ababyeyi rero batege abana amatwi.”

Mukato Sonia ni umukobwa w’imyaka 24 ukunda abantu, cyane umuryango we ndetse akaba aharanira icyamuteza imbere n’igihugu cye.

Tanga Igitekerezo ukoresheje Facebook

TURAKWAMAMARIZA Niba uri umucuruzi, umushoramari, Umuhanzi n'abandi bantu bose bifuza kwamamaza, IBYAMAMARE.com turagufasha kwamamaza ibikorwa byawe bigere kubatuye isi yose kuko dusurwa n'abarenga miliyoni 2 buri kwezi, tugukorera inkuru, tukakwamamaza kumbuga nkoranyamba zacu zose harimo facebook, instagram, twiter na Youtube kandi bigakobwa gatatu mu Cyumweru ukwezi kose twamamaza ibyo ukora ndetse dushishikariza abantu kubimenya. DUHAMAGARE cyangwa utwandikire KURI Wats APP: +250 7830 35616 Cg utwandikire kuri Email : ibyamamarenews@gmail.com
SHARE