Perezida Joe Biden yahawe urukingo rwa Covid-19 bikorerwa kuri televiziyo bose babireba(Amafoto)

Perezida watowe w’Amerika Joe Biden yahawe icyiciro cya mbere cy’urukingo Pfizer rwa Covid-19, avuga ko yakingiwe kugira ngo yereke Abanyamerika ko “nta kibazo ruteje ku buzima”.

Biden yiyongereye ku mubare ukomeje kwiyongera w’abategetsi bafashe urwo rukingo , barimo Visi Perezida Mike Pence na Nancy Pelosi, umukuru w’inteko ishingamategeko umutwe w’abadepite.

Perezida watowe w’Amerika Joe Biden yahawe icyiciro cya mbere cy’urukingo Pfizer rwa Covid-19

Ku cyumweru, hatangiye gutangwa urukingo rwa kabiri rwa Moderna, rwemejwe mu cyumweru gishize.

Ubu bivugwa ko Abanyamerika barenga 500,000 bamaze gukingirwa

Avugira mu mujyi wa Newark muri leta ya Delaware, aho yakingiwe birimo kunyura kuri televiziyo, Bwana Biden yagize ati: “Ndimo gukora ibi kugira ngo nereke abantu ko bakwiye kwitegura igihe urukingo ruzaba rubagezeho ngo barufate”.

Ati: “Nta kintu na kimwe gihari cyo kugirira impungenge”.

Yavuze ko ubutegetsi bwa Trump “bukwiye gushimirwa ukuntu” kubera gutangiza gahunda y’igihugu y’ikingira.

Jill Biden, umugore wa Biden, mbere yaho ku wa mbere na we yari yakingiwe, nkuko uyu perezida watowe yabivuze.

Kamala Harris, wiyamamaje hamwe na Bwana Biden akaba ari Visi Perezida watowe, ndetse n’umugabo we Doug Emhoff, biteganyijwe ko bakingirwa bwa mbere mu cyumweru gitaha.

Itsinda ry’abazakorana bya hafi na Biden ku butegetsi bwe, ryihaye intego yuko Abanyamerika miliyoni 100 bazaba bamaze guhabwa urukingo rwa Covid-19 mu minsi 100 ya mbere y’ubutegetsi bwa Biden.

Kugeza ubu muri Amerika hamaze gutangazwa abantu barenga miliyoni 18 banduye coronavirus, muri bo abarenga 319,000 yarabishe, nkuko imibare ya Kaminuza ya Johns Hopkins ibigaragaza.

Trump ntarikingiza

Perezida Donald Trump, mu kwezi kwa 10 wamaze iminsi itatu mu bitaro arwaye coronavirus, ntabwo yavuze igihe azakingirirwa.

Trump ubu ni umwe mu ba nyuma mu bategetsi bo hejuru batorwa batarafata uru rukingo rumwe muri ebyiri ziteganyijwe.

Mu butumwa bwo kuri Twitter ku itariki ya 13 y’uku kwezi kwa 12, yagize ati: “Ntabwo nakoze gahunda yo gufatiraho urukingo, ariko mfite amashyushyu yo kubikora mu gihe gikwiye”.

Bamwe mu bajyanama be baramushyigikiye ku gucyerererwa gukingirwa, bavuga ko akirinzwe n’ubwirinzi bwavuye ku miti yahawe agakira iyi virusi ubwo yari arwaye.

Tanga Igitekerezo ukoresheje Facebook

TURAKWAMAMARIZA Niba uri umucuruzi, umushoramari, Umuhanzi n'abandi bantu bose bifuza kwamamaza, IBYAMAMARE.com turagufasha kwamamaza ibikorwa byawe bigere kubatuye isi yose kuko dusurwa n'abarenga miliyoni 2 buri kwezi, tugukorera inkuru, tukakwamamaza kumbuga nkoranyamba zacu zose harimo facebook, instagram, twiter na Youtube kandi bigakobwa gatatu mu Cyumweru ukwezi kose twamamaza ibyo ukora ndetse dushishikariza abantu kubimenya. DUHAMAGARE cyangwa utwandikire KURI Wats APP: +250 7830 35616 Cg utwandikire kuri Email : ibyamamarenews@gmail.com
SHARE