Twasuye i Rutsiro,Bakina Sinema har’icyo basaba Akarere kabo,Itangazamakuru n’abamamaye muri Sinema mu Rwanda

Akarere ka Rutsiro, ni kamwe mu turere 7 tugize  Intara y’Uburengerazuba bw’u Rwanda,kari kuri km 34  uvuye ku biro by’Intara, n’ibirometero 150 km uvuye mu murwa mukuru w’Igihugu Kigali,gahana imbibi n’Akarere ka Ngororero na Karongi,Rubavu na Repubulika Iharanira Demukarasi ya Congo,gatuwe n’abasaga 264.360 ku buso bwa 1157,3km2. Urubyiruko ruri munsi y’imyaka 25 y’ubukure rubarirwa muri 70% by’abatuye Rutsiro.

Uyu munsi IBYAMAMARE.COM twasuye urubyiruko rwo mu karere ka Rutsiro mu murenge wa Mushonyi tuganira n’itsinda ry’Urubyiruko ryitwa ABADAHUSHA & SMART FILM MAKING bishyize hamwe binjira mu ruganda rwa Sinema,batunganya amashusho ndetse bafata amafoto mu birori bitandukanye bakarushaho kwiteza imbere mu buzima busanzwe bikabakura no mu bwigunge dore ko batuye kure y’umujyi.

Kuba bafite amashanyarazi uru rubyiruko ruyobowe na Tuyishime Silas rwaricaye rureba icyaruteza imbere binyuze mu mpano bakanabyaza umusaruro ayo mashanyarazi maze bashinga iri tsinda rimaze gushyira hanze amashusho ya Filime bakaba bagenda banabona akazi ko gutunganya amashusho ndetse n’amafoto mu birori bitandukanye mu murenge batuyemo no mu nkengero zawo.

Silas Tuyishime umuyobozi wa Abadahusha&Smart Film Company wahurije hamwe uru rubyiruko

Uyu Silas Tuyishime atangaza ko bitari biboroheye kwihuriza hamwe kuko usanga mu bice by’icyaro aho batuye bigoye kubona aho bidagadurira ariko bagerageje nk’abanyempano bafite intego gushiruka ubute bakareba inzira zose bakoresha ngo inzozi zabo zibe impamo

“Aha iwacu biragoranye kubona aho kwidagadurira,byadusabye imbaraga nyinshi no kwihuriza hamwe maze tureba uko twazakabya inzozi zacu binyuze mu mpano zacu,turashaka gukuraho imvugo ifata abanya Rutsiro nk’abantu basigaye inyuma mu myidagaduro”

Akomeza agira ati : “Yego dutuye mu cyaro ariko ubu byaroroshye dufite ibikoresho n’abanyamujyi bakoresha nka Camera nziza,imashini zigezweho ndetse nkanjye nize bihagije gutunganya amashusho ku buryo bwa gihanga urumva dufite ubushobozi ntitugomba guheranwa n’ubwigunge kandi tugomba no kubyaza umusaruro ubumenyi bwacu,igishimishije kurushaho n’ababyeyi bamaze kubibona nk’ibintu by’ingirakamaro ntawubangamira umwana we kuko natwe tubatoza kwitwararika “

N’ubwo ariko bagerageje kwihuriza hamwe ngo babe babayaza impano bifitemo umusaruro ngo barusheho kwiteza imbere no kubaka igihugu Silas Tuyime uzwi nka Dj Akpum avuga ko bikigoranye kuba baba ibyamamare kuko bagihura n’imbogamizi nyinshi ziganjemo iz’ubushobozi,kuba nta tangazamakuru ribageraho bya bugufi,kuba ubuyobozi bw’akarere budashyira imbaraga mu bikorwa by’imyidagaduro kandi biri muri bimwe bimenyekanisha akarere

Hari ibyo basaba abateye imbere muri Sinema

“Nibyo uru ruganda rwa Sinema twinjiyemo hari abarudutanzemo bazi byinshi kuturusha,icyambere tubasaba n’ukwibuka ko no mu cyaro tubakunda kandi harimo abana b’abahanga bafite impano bifuza gutera ikirenge mu cyabo,bajye batwegera badusure banaze badususurutse,batugire inama uko twarushaho gukora aka kazi kinyamwuga”

N’ubwo batuye mu bice by’icyaro bizera kuzagera kure kubera impano zabo

Hari ubutumwa bageneye Itangazamakuru

“Itangazamakuru niwo musingi w’imenyekana ry’umuhanzi cyangwa undi munyempano wese ,icyo tubasaba n’ukutwegera nk’uku IBYAMAMARE.COM mwigomwe mukadusura,Itangazamakuru ritwegere twerekane impano zacu,hano hari abana baririmba,ababyina,abakina Sinema n’abamurika imideli ariko biragoranye kurenga aha iwacu kuko nta gisunika bafite,Itangazamakuru ritwegereye nta kabuza natwe twagera kure.”

Aba banyempano har’ubutumwa bageneye Ubuyobozi bw’Urubyiruko mu karere ka Rutsiro ndetse n’ubuyobozi bw’Akarere muri rusange 

“Turasaba Abayobozi b’Urubyiruko mu karere ka Rutsiro kuva mu biro bakegera urubyiruko mu mirenge maze tugakorana bakanatugira n’inama mubyo dukora kuko birababaje kuba i Rutsiro dusa nk’abari inyuma mu myidagaduro turasaba ubuyobozi bw’akarere by’Umwihariko kutwubakira ahantu ho kwidagadurira tukabona ibigo by’urubyiruko kuko byafasha urubyiruko rwinshi kutishora mu biyobyabwenge ndetse n’ubusambanyi bukururira abangavu gutwara inda zitateguwe.”

Silas Tuyishime umuyobozi wa Abadahusha&Smart Film mu kiganiro na IBYAMAMARE.COM yasoje asaba urubyiruko kutitinya rukagaragaza impano zabo ndetse bakarushaho kugerageza gukoresha ibikoresho by’ikoranabuhanga kuko bituma abagituye mu bice by’icyaro bamenya amakuru agezweho na gahunda z’Igihugu.

imwe muri Filime zisekeje za Abadahusha and Smart Film Company

Tanga Igitekerezo ukoresheje Facebook

SHARE

1 IGITEKEREZO