U Rwanda rwakiriye icyiciro cya mbere cy’inkingo za Coronavirus ibihumbi 240 zo mu bwoko bwa AstraZeneca

Minisiteri y’Ubuzima (MINISANTE) yatangiye kwakira inkingo za Covid-19 kuri uyu wa Gatatu, aho biteganyijwe ko hakirwa izirenga ibihumbi 300, muri gahunda yiswe Covax y’Ishami ry’Umuryango w’Abibumbye rishinzwe Ubuzima (OMS), igamije gusaranganya inkingo ku batuye isi bo mu bihugu byose.

Indege itwaye icyiciro cya mbere cy’inkingo ibihumbi 240 z’icyorezo #COVID19 zo mu bwoko bwa AstraZeneca yageze i Kigali ahagana saa mbiri za mu gitondo kuri uyu wa 03 Werurwe 2021.

U Rwanda rwakiriye icyiciro cya mbere cy’inkingo za Coronavirus ibihumbi 240 zo mu bwoko bwa AstraZeneca

Biteganyijwe ko icyiciro cy’izindi nkingo za Covid-19 zo mu bwoko bwa Pfizer zingana na 102,960 zigezwa i Kigali nimugoroba.

U Rwanda rubaye igihugu cya kane muri Afurika gihawe inkingo za Covid-19 muri gahunda ya Covax, nyuma ya Ghana Nigeria na Côte d’Ivoire.

Minisiteri y’Ubuzima yatangarije RBA ko ku ikubitiro hazakingirwa abantu 171,480 barimo abakozi bo kwa muganga, abarengeje imyaka 65 y’amavuko, abasanganywe izindi ndwara n’abandi bari ku isonga mu rugamba rwo guhangana na Covid-19.

MINISANTE ikaba itangaza ko igikorwa cyo gukingira kizatangira ku wa Gatanu w’iki cyumweru, ariko inkingo zizaba zoherejwe mu bitaro by’uturere no mu bigo nderabuzima 508 biri hirya no hino mu gihugu.

Intego ya Minisiteri y’Ubuzima ngo ni uko umwaka wa 2021 mu Rwanda hazaba hakingiwe 30% by’abaturage ariko umwaka wa 2022 ukazarangira abakingiwe bagera kuri 60%.

 

Tanga Igitekerezo ukoresheje Facebook

SHARE