Uwihirwe Yasipi wabaye igisonga cya mbere cya Nyampinga w’u Rwanda, yiyemeje kuvuga kubakobwa biyita aba Slayqueen, basigaye bagereranwa n’indaya ziyubashye

Uwihirwe Yasipi Casimir wabaye igisonga cya mbere cya Nyampinga w’u Rwanda 2019 aherutse gushyira hanze umuvugo uvuga ku bakobwa bazwi nka Slay Queen n’uburyo bateshwa agaciro mu muryango nyarwanda.

Umwaduko w’ikiragano cy’imbuga nkoranyambaga wazanye byinshi birimo n’abakobwa bahawe izina rya Slay queen.

Uwihirwe Yasipi Casimir wabaye igisonga cya mbere cya Nyampinga w’u Rwanda 2019

Abo ngo ni abari bakunda gushyira amafoto menshi ku mbuga nkoranyambaga berekana ubuzima bw’ikirenga babayeho, basohokeye ahantu heza nko muri za hoteli, ku nyanja se, bambaye imyenda mishya kandi myiza n’ibindi nyamara nta kazi kazwi bafite bakesha ubwo buzima.

Aba bakobwa akenshi baribasirwa bagatukwa, bamwe babita indaya, ibyomanzi n’ibindi bigaragaza ko bataye umuco.

Uwihirwe Yaispi Casimir wabaye Igisonga cya mbere  cya Nyampinga w’u Rwanda 2019, akaba ari n’umuhanzi w’imivugo, yahimbye kuri aba bakobwa umuvugo witwa “Slay Queens= Future Mamas”.

Yavuze ko uyu muvugo yawuhimbye bitewe n’uburyo abakobwa b’aba-slay queen bahohoterwa bakandagazwa mu ruhame, nyamara ababikora bagaca ruhinga nyuma bakongera kubashyigikira.

Yaspi Casimir yemeza ko aba bakobwa b’aba-slay queen ntaho bataniye n’abakora umwuga w’uburaya ariko mu buryo bwiyubashye.

Ati “ Kugira ngo atwereke ubwo buzima buhenze, hari byinshi yigomwa kugira ngo abibone, ari hahandi usanga kugira ngo abone iyo foto yasohokeye muri Mariott azashaka umuntu ufite ubushobozi bwo kumujyana yo nibishake bigere ku rugero rwo kugurisha ubuzima bwe ariko iyo foto ayibone.”

Yaspi Casimir yemeza ko aba bakobwa b’aba-slay queen ntaho bataniye n’abakora umwuga w’uburaya ariko mu buryo bwiyubashye.

Uyu mukobwa avuga ko ibikorwa by’aba bakobwa atari byiza ariko na none abantu badakwiye kubafata nk’ibicibwa ngo babandagaze ahubwo bakwiye kubereka inzira nziza bakwiye gucamo.

Ati “Yego ibyo bakora ni bibi ariko na none ntiturebe ku ruhande rumwe. Kuko ntabwo ari we wakwijyana ngo yambare kuriya, birerekana ko hari urundi ruhande tutajya tuvuga nyamara ariho ikibazo kinini kiri. Aho kugira ngo twicare tubatuke dukwiye kureba aho ikibazo kiri n’uko cyakemuka. Mbere y’uko bagawa bakwiye kwereka icyo bamarira umuryango kugira ngo abana babyiruka basange aho bari gukurira atari ahantu handuye.”

Yaspi Casimir avuga ko abenshi mu bashimye uyu muvugo ari abahungu, ibigaragara ko hari abakobwa benshi bashobora kuba bariyumvise, gusa nta kibazo afite ko hari abamwanga mu gihe yavuze ukuri.

Tanga Igitekerezo ukoresheje Facebook

SHARE