Ikipe ya Real Madrid yamaze gusesekara i Paris bambaye amakositimu adasanzwe(Amafoto)

Ikipe ya Real Madrid yamaze gusesekara i Paris mu gihugu cy’u Bufaransa, aho yitabiriye umukino wa nyuma wa UEFA Champions league.

Iyi kipe y’i Madrid irahurira ku mukino wa nyuma wa ririya rushanwa ubera i Parc des Princes na Liverpool yo mu Bwongereza.

Ni ku nshuro ya karindwi Liverpool iza kuba ishaka Igikombe cya UEFA Champions league, mu gihe Real Madrid iza kuba ishaka icya 14.

Ku mugoroba w’ejo ni bwo abakinnyi ba Real Madrid basesekaye i Paris barangajwe imbere n’umutoza Carlo Ancelotti.

Amafoto iyi kipe y’i Madrid yashyize hanze ubwo yiteguraga guhaguruka muri Espagne yerekana abakinnyi bayo bambaye amakositimu adasanzwe, ibyatumye abatari bake bacika ururondogoro.

Ababonye uko Real Madrid yari yambaye, bavuze ko ntaho bitandukaniye n’imyambarire y’abanyabyaha batandatu bagaragara muri filime ’Reservoir Dogs’ iri mu zakunzwe mu myaka yashize.

Abakinnyi nka Gareth Bale na Marcelo byitezwe ko bakina imikino ya nyuma bambaye umwambaro wa Real Madrid bari muri 26 Real Madrid yamanukanye i Paris.

Rutahizamu Karim Benzema na Vinicius Jr bari mu bitezweho cyane guteza ibyago Liverpool na bo bari mu baraye mu Bufaransa.

Aba baraza kuba bahanganye na Liverpool irangajwe imbere na Mohamed Salah cyo kimwe na Sadio Mané barahiriye kwihorera kuri Real Madrid.

Ni nyuma yo kubatsinda ibitego 3-1 ku mukino wa nyuma wa UEFA Champions league wari wabereye i Cardiff, ndetse Salah akaza kuwusohokamo hakiri kare cyane nyuma yo kuvunwa na Sergio Ramos.